الكاتبة : عزة
الحلقة 01
فقت الصباح كي العادة ديما روطار عملت روتيني و لبست قشي و خرجت من غير ما ناكل حاجة، لازم نلحق للجامعة ولا ما تسلكش على خير ... و ايه من غير ما تحتاروا عايشة وحدي رغم صغر سني كلش رح تعرفوه مع الوقت
اسمي مايا روسيم و الكل يعرفوني بإسم مايا بس
خلصت مول الطاكسي و نزلت نجري باش نحضر المحاضرة
الاستاذ : شرفتينا آنسة مايا كالعادة دايما روطار
مايا : سامحني استاذ و الله ضروف
الأستاذ : كلنا عندنا ضروف و يالاه تفضلي
جلست في آخر الصف نحاول نتفادى لي قاعدين يشوفو فيا لي يضحك عليا و لي عاملني نكتة و يضحك الناس عليا و لي شافق على حالتي مع الأسف
بقيت نتبع مع الأستاذ بعدين شفت في النافذة الشتاء كانت قاعدة تنزل رجعت بيا الذاكرة للماضي
مايا : ليال ماما وين
ليال : رح تجي بعد شويا شوفي الشتا راهي تصب محلا ريحتها
مايا : شوفي قاعدة تدخل علينا من الصقف رح نبردو كاملين
ليال : حتى بيتنا قاعد يبكي معانا ههه
انفتح الباب و دخلت ماما (راحيل)
راحيل : باباكم جا ولا لا
ليال : راجلك يا ماما هذا راجل مش بونا نحنا بابانا توفى الله يرحمه
راحيل : اسكتي ولا رح يسمعك يقتلنا الكل، اختك مزالها صغيرة تعمريلها في راسها صوالح اكبر منها يا بنت
ليال : و حتى انا كنت صغير أمي و إنتي سكتي
عمر : وينك يا بنت الكلب يالاه جا وقتك
راحيل : رجاءا وقف شي لي قاعد تعمل فيه البنت صغيرة يا عمر صغيييرة
عمر : ليااال قومي راني نقلك
شدها من ايدها داها معاه و سكر الباب موراه
مايا : ماما وين داها بابا وين راحت ليال
بعد دقايق سمعت أختي و هي تصرخ بإسمي و صوت الرعد برا عامل حالة
مايااااا ماياااا مايااا حتى سمعت خبطة عند راسي فوق طاولة خلاتني نفيق من الذاكرة المرة هادي
الاستاذ : يعني جيتي روطار وزيد منعرف وين غايسة صارلي ساعة نعيط عليك و انتي فأحلامك الوردية هزي قشك و تفضلي برا
كل الطلاب قعدوا يضحكوا عليا و انا إيدي ترجف مستحيل نرتاح من هاذ الماضي مستحيل شفت في الأستاذ و قلت
مايا : مش كل أحلامنا وردية أستاذ و خرجت نركض هاربة من ضحكاتهم💔
_ رح نعرفكم بالأسموات لي نذكروا في المقدمة _
مايا بطلة القصة عمرها 22 سنة عايشة وحدها رح تعرفو علاش مع الأحداث و واش صرا لعايلتها، مشكلتها أنها تحاول تتصارع مع ماضيها و تحاول تنسى لكن مش كل حاجة تتنسى شي حاجات لازم نعرفوا كيفاش نعيشوا معاها
ليال : اخت مايا الكبيرة عليها بأربع سنين
راحيل : أمهم توفى زوجها لما ولدت مايا
عمر : زوجها الثاني بعد وفات زوحها الأول بثلث سنين
الحلقة 02
بعد ما طردني الأستاذ خرجت من الجامعة كامل مصروفي قل و لازمني شغل في أقرب وقت، بقيت ندور ماخليت ولا مطعم حتى فام دوميناج في أي محل و مكانش بلاصة بفففف نعلبو الزهر هدا
بقيت نتمشا و مريت من شارع كان ضيق و يخوف الصراحة حبيت نرجع لين سمعت صوت موسيقى جاي من مكان قريب من زمان كان حلمي نولي مغنية ❤ و الصوت هذا زاد خلاني نتعلق بحلمي و من غير ما نحس لقيت روحي قدام محل ولا منعرف شي هذا الشي الوحيد لي يفصلنا هو باب كبير دقيت عليه و مكان حتى رد حاولت نفتحو و نفتح صح
دخلت و انا محتارة لقيت كأنها صالة كبيرة و عليها خشبة مسرح و فيها بار و وين يقدموا المشروب و طاولات كثيرة لكن كلش فارغ سمعت الموسيقى من جديد و راجل قاعد يعيط على لي قاعدين يغنوا
شديت صاك أدو نتاعي في يدي و حاولت نرجع من وين جيت من غير لا يحسوا بيا لين ما سمعت صوته وقفني
الراجل : شكونك إنتي علاش جيتي لهنا؟
مايا : سامحيني شكلي غلطت في المكان
الراجل : هههه خبريني لوين كنتي رايحة بعدها نعرفوا اذا غلطتي ولا انتي في المكان صح واش رايك
مايا : الصراحة الموسيقى لي سمعتها هي لي جابتني لهنا كنت ندور على شغل
الراجل : يعني تغني؟
مايا : ايه و لكن عمري لا غنيت قدام ناس
الراجل : عارفة أنو هذا بار؟
الحلقة 03
مايا : بقيت نشوف من و من و هزيت براسي إيه و قلتلو هذا وين عرفت يعني باين و انا قاعدة نشوف في الميني بار وين كاين الشراب
الراجل : واش رايك تغنيلنا اغنية و نشوفو براعتك يا آنسة ...
مايا : مايا إسمي مايا
الراجل : هيه شنو قلتي
حطيت ساك أدو نتاعي في الأرض و طلعت على المسرح شفت ثلاث بنات جاو من غرفة ثانية و قاعدين يطالعوا فيا
الراجل : يالاه وقت لي تحبي أبداي
نطقت وحدة من البنات : واش بوص شكلك راح تبدلنا
قبل لا ينطق شديت الميكرفون و بديت نغني كل الطاقة السلبية حاولت نخرجها في أغنيتي و بس كل الجروح لي قاعدة تخنقني حاولت نحطلها مرهم بكلماتي بلاك نبرا و نرتاح بقيت دقايق و انا قاعدة نغني لين توقفت حليت عيني شفتهم قاعدين يطالعوا فيا و ساكتين نزلت من المسرح هزيت صاك أدو نتاعي و حاولت نخرج لي يد شدتني و حبستني
الراجل : اسمي انيس صاحب هاذ البار و يشرفني أنك تغني عندي رح نعمل إفتتاح غدوا شرايك تغني عندي يعني شغل تشتغلي
مايا : بعدت إيده و قلت سامحني و لكن هذا بار ما نقدرش يعني تعرف الأجواء كيفاه
أنيس : موافق على شروطك و المبلغ رح يكون $$$$ لليلة ويمكن يزيد الضعف اذا كان الحضور بزاف و تقبلوا عرضك
مايا : بقيت نشوف فيه زح المبلغ لليلة وحدة يعيشني شهر اوك راح نوافق لكن عندي شرطين، رح نغني و بس يا ريت ولا واحد يقرب مني ولا يدخل في أي حاجة فيا، و الشرط الثاني نحط اسم مستعار و شعر يعني نغير شوي ملامحني مانيش حابة يعرفوني شي ناس
أنيس : موافق آنسة مايا ألف مبروك شفتي قلتلك يمكن ماكيش غالطة في مجيتك
مايا : شكرا
أنيس : ملتقانا غدوا التسعة بليل
