الكاتبة : منى
الحلقة 01
في روما وبالضبط في منطقة غابية تسمع غير فرانات طموبيلات دايرة حالة ولي تفوت فيهم تخلي وراها عجاجة طيرك نورمال يتسابقو شكون يوصل لول قبل ثاني لآخر الغابة وفي الاخير حبسو مع بعضاهم قدام فيلا اقل ما يقال عنها تحفة، جاو لي قارد حلو عليهم ونزلو بالهيبة تاعهم لول ينسيك في الثاني من ناحية الزين والقوة والشخصية الفرق بيناتهم انو اللول راجل بكامل هيبتو ورجوليتو الف طفلة تتمنا منو شوفة والثاني مرا اقل ما يقال عنها قنبلة موقوتة انوثة طاغية ضربو الكف في الكف ودخلو للفيلا يسمعو في حس في الصالون عرفوهم مجموعين وهاذا هو المطلوب دخلو بعد ما القو سلام.
الجد : نضن ماناش نستنو اكاك في الباطل ونضن انكم جبتو شي لي نحوس عليه
ليث : وعلاه نحنا نقدرو ندخلو بلا نجيبو المطلوب منا
ليلي : حتى هو الواحد مزال صغير لا زواج لا ذرية تنوب عليه حتى كون يموت يرثوه اموا
طرطقت العايلة كامل بالضحك إلا الجد طبعا لي مزير وجهو وكشاكشو طالعة من الزوز لي لا يحشمو لا يسمعو بيها
الجد (خبط العصا تاعو على الارض وبهدرة جدية ياسر): نضن مانيش قدكم حتى تتمسخرو معايا ومانيش قاعد لتفوريخ تاعكم
ليث (بنضرة كلها جد عكس الوجه الضاحك لي كان يهدر مقبيل): الجزائر وبالضبط في مدينة تبسة
ليلي (بنضرة كلها غرور وكبرياء وقوة في نفس الوقت مزيج من انوثة وقوة متبانش بلي نفسها لي قبيلة تضحك): دار في centre ville وسنة ثالثة في جامعة الاعلام والرياضيات العمر 22 سنة متحجبة عندها صحبة وحدة
الجد (وهو واقف وخارج من صالون): من هنا على سمانة تكون في الفيلا هنا و متنسوش تديرو اتصال لروسيا نحبو من هنا لاخر سمانة كامل حاضرين واكم فاهمين على واه نحكي
ليث وليلي : حاضر
اياد وهيثم : تهنى
المهم نعرفكم على شخصياتنا هاذو عائلة سلطاني من اغنى العائلات في روما، عندهم شركات ازياء مشهورة عالميا وباينة عندهم فروع في مجموعة من البلدان منهم (الجزائر، فرنسا، روسيا) وهاذي الخدمة وشركات ماهي الا غطاء على اعمالهم لي راح نعرفوها مع الوقت واما على افراد العايلة راح نعرفوهم مع الكرونيك باه متتخلطلكمش.
الحلقة 02
في الجزائر وبالضبط في الجامعة داخل الكور مركزة مع البروف قلب ورب قطع تفكيرها هدرة صحبتها
اميرة : يااااو فيقي يا زح صاي برك لي يشوفك يقول هاذي بنت انشتاين وانا نحلفلك بعذريتي لي مزالها غير مفاهمة فيها والو
سيا : والله تقول طليتيلي على قلبي صح مانيش فاهمة والو على بيها مركزة يا بهيمة باه نفهم وضرك بلعي عليا فمك لا قريتي لا خليتينا نقرو
اميرة : يا سيا يا خيتي راي دنيا ماهيش قراية برك راي شوية لعب شوي ضحك شوي تمسخير شوي قراية
سيا : ماشي كون بلعتي عليا ماشي خير منهار عرفتك ونتي تفتي عليا وكون اموا ربحنا من فتواتك
اميرة : اصلا انتي ماكيش مستعرفة بالنعمة لي عندك
سيا : 🙄
اميرة : اني نحكي على روحي عطاك ربي وحدة كيما انا نعمة بكلي احمدي ربي ليل ونهار لي كيفك ام يحوسو عليا
سيا : مزية عندي برك ولا راي تبسة خلت من جد باباها ايا ايا اخرجي قدامي لكور او تم عندو ساعة وانتي ابقي انبحي على راسي
اميرة : هلا لاش مقلتيليش امشي امشي نوكلو
سيا (تضحك على صديقة عمرها): مجنونة امشي امشي ههههههه
خرجو لبنات رايحين يفطرو ويروحو على خاطر كملو قراية بعد مكملو لبنات فطرو روحو للدار ...
سيا : ماما ماموتي ماميييييي وينك يا زينة النسا وينك يا نعنوعة قلبي
نعيمة (وهي خارجة من الكوزينة تمسح في ايدها): اني هنا يا لالة والله يا لي يسمعك كيما تقول يما الله يرحمها كون مجيت نعرف كسرة يما نقول قاطو
سيا (تحضنتها من لور): خسارة عليك نعنوعة تعرفينش نحبك حب روميو لجولييت
نعيمة (وهي تبعد فيها وتضحك دخلاني على جنان بنتها): بعدي بعدي يا بلية كرشي منعرف واش درت حتى جبت نصيبة زيك
سيا : والله كون حكمتي روحك انتي ومحمد راكم متهنيين اني جاية ليكم بسلامتكم ( وطلعت تضحك هاربة على بالها راح تجيها شلاكة 44)
نعيمة (ضربتها بشلاكة المهم شلاكة يعني طرباقة منعرف نتوما كيفاه تقولولها): اه منك يا بنت كرشي لا حشمة لا حيا منعرف لشكون جيتي
سيا (طلت عليها وهي تضحك): طلعت لي يا نعنوعة يا سراقة قلب محمد
نعيمة (وهي تضحك): روحي بدلي وارواحي يا مصيبة
نعرفكم هاذي بطلتنا سيا طفلة متحجبة عمرها 22 سنة مدية حقها من الزين، تقرا اعلام ورياضيات طفلة زهوانية ومجنونة لي فقلبها على لسانها وقلبها ابيض وحنينة ناس كامل تحبها غير على طيبتها بصح لي ميعرفوهش لي هي كيما البركان نهار تتغشش والا تتقاس حاجة تحبها تتقلب 360 درجة على قد ماهي حنينة على قد ماهي واعرة متسكتش على حقها وتكره الظلم عايشة مع امها نعيمة ومحمد لي تزوجو بعد قصة حب كبيرة عايلتها معندهمش ومخصهمش محمد يخدم مدير مدرسة وموفرلهم كلش عندها صحبتها وحدة اميرة هي عشيرتها واختها لي مجابتهاش امها.
*تيليفون يصوني*
محمد : الو
👤 : .....
محمد (وجهو صفار): ك ك كيفاش ضرك
👤 : .....
محمد :بصح متفاهمناش هك
👤 : .....
محمد (وعلامات القهر على وجهو): باهي كيما تحب باي
👤 : .....
بعد ما كوبا محمد يهدر مع روحو "ياربي كيفاش راح ندير ضرك يا ربي راني منقدرش يا ربي ... لا يا محمد انتا اصلا كنت عارف نهايتها هك ... بصح حاجة اكبر مني نشالله خير برك يا ربي صبرني"
الحلقة 03
_ في الجزائر _
روح محمد للدار وهو مهموم تحسو هاز هم الدنيا كل فوق راسو دخل للدار سلم على نعيمة وسيا وحاول يكون عادي قدر المستطاع بصح نعيمة مافاتش عليها الشي هاذا باينة ما هي عشيرة عمرو وتعرفو اكثر من روحا
محمد : اني طالع نرتاح نعنوعة جيبيلي كاس قهوة للشمبرة
نعيمة : على عيني غالي وطلب رخيس
سيا : بابا لباس
محمد : لباس الغالية لباس تعب برك
سيا : ربي يعينك باباتي
باساتو وطلعت لشمبرتها ومام محمد طلع لشمبرتو ونعيمة راحت تديلو قهوة وتشوف وشبيه ... دخلت نعيمة الشمبرة لقاتو متكي وحاط يدو على عينو جات على طرف سرير وقعدت
نعيمة : محمد واش كاين؟
محمد : شي انعنوعة متقلقيش تعب برك
نعيمة (نضرة جد): محمد مانيش عرفتك ليوم برك راك عشرة عمر معايا واش كاين
محمد (قعد وريقل روحو على بالو مهما واش حاول ميقدرش يكذب عليها ماهي حبيبتو تفهمو من شوفت عينو): نعيمة جا الوقت
نعيمة (الدموع في هينها قلبها حسسها): واش من وقت يا محمد
محمد : ...
_ فلاش باك _
محمد : الو
ليث : اهلا عمي نشالله صحة بخير لمهم عمي منطولش عليك وحد الامانة اني جاي نديها
محمد (وجهو صفار) : ك ك كيفاش ضرك
ليث : اذاكا هو اعمي 22 سنة نضن ياسر
محمد : بصح متفاهمناش هك
ليث : عمي هاذي اوامر جدي وهو على بالو واش يدير يعني انتا على بالك بلي اخرتها معانا وانتا وافقت اول مرة
محمد (وعلامات القهر على وجهو): باهي كيما تحب باي
ليث : هيا باهي اعمي غدوة نكون ثم نلقاها واجدة
_ نهاية الفلاش باك _
نعيمة (وهي دموعها وديان وتشهق): يعني صاي امحمد كبدتي راهي منقدرش امحمد منقدرش شي اقوى مني
محمد (وعيونو مرغرغين بالدموع): اني اعظم منك انعيمة راهي نصي هاذيك وكبدتي يعني تشوفي فيها ساهلة عليا بصح نحنا من لول وافقنا على الشي اذا
نعيمة : صح مولدتهاش من كرشي بصح قطعة من روحي ربي مرزقنيش الذرية بصح عوضني بيها هيا روحي ودنيتي مزلت مشبعتش بيها امحمد مزلت (تشهق بالبكا)
محمد (متحضنها ويواسي فيها وهو حالتو اكثر منها): راني حاس بيك انعنوعتي حتى نا حسها جمرة فوق قلبي روحي احكي معاها نشالله تتفهم الوضع ومتحقدش علينا برك راني منقدرش نشوف نضرة الكره في عينها راهي بنتي حتى وماهيش من صلبي
نعيمة (تمسح في دموعها وتقوي في روحها وهي محطمة): باهي نشالله تتفهمني برك
