كرونيك زوجتي لا تحبني - الحلقة 3

كرونيك زوجتي لا تحبني

رنيم تحكي _

مش قادرة نشووف فيه ولا نحكي معاه حاسة بضغط وانا يقولولي خطيبته، مش متقبلاته حتى كي سمعت بجنازة تاع خوه رفضت نروحلها غير علجال اني مش حابة نقابله مش حابة ناس تقلي ااه نتي خطيبة خالد اوووف.

القصة كلها بدات وقت جاء واحد قال عليا لدارنا مكنتش نعرفه نعرفه بالاسم برك، بصح كيما كانت تحكي عليه ماما تقلي حسب ونسب و عنده دراهم مكنتش مهتمة قلت حتان نشوفه ونحكم، لقيته باعثلي انفيت في فيسبوك قرعجت في فيس مالقيت حتى فوطو.

قبلته حكينا عقليته مليحة بصح حبيت نشوفو، انا كنت نخدم في حانوت بيع حوايج تاع نساء قتله نخرج من خدمة نتلاقاو في كافتيريا فولانية قالي معليش.

روحت هذاك نهار تزينت كملت خدمة وصلت بلاصة قعدت، بقيت نسنى نص ساعة، عيطتله قالي معنديش جرءة نجي ونقابلك قتله كييفاه كوبيت عليه، جيت نايضة وانا خارجة حكمني واحد من يدي درت نلقى واحد هز ورد سمين وعنده كرش ...

خالد : رنيم معليش تقعدي انا خالد

بقيت نخزر فيه من شدة الشوك، كنت متوقعة راجل طويل (هو طويل بصح كي عاد سمين يبان قصير) عضلات لابس كوستيم وساعة وكذا شوكاني، بصح قعدت محبيتش نحشمه.

خالد : حشمت مجاتنيش جرءة في اول نوقف بحذاك

رنيم : عادي

خالد : تشربي كاش حاجة؟

رنيم : تأخرت على الدار لازمني نروح

نضت وخليته معرف متقبلتش هذا الشكل خاصة اني من مدمنة مسلسلات تركية، نحلم بإنسان طويل كيما كمال ولا مهند، مع العلم انا كنت زييينة روحت لدار فيسبوك معادش نفتحه قلت ماما مانيش قابلة بيه، بصح خويا قالي خممي انا كنت مصرة حتى خويا صارحني انه مداين معاه و قالو لوكان نقبل بيه يسمحله فالدين.

عدت نخمم قبلت بيه فوق قلبي، وصلني مرة لخدمتي شافوه صحباتي في خدمة ايا ناضو يعلقو خيار ما خيرتي ههه وضرك هذا نتي لي تهزي حمر منه ولا هو، خبطت عليهم طابلة قلتلهم يزيكم اصلا قبلته علجال دراهم لا بيا حبه لا وااالو، لقيتهم كل ساكتين حسيت حاجة ورايا مع نتلفت نلقاه هو هز ساكي هدر بصوت مغصوص و قالي نسيتيه في طاكسي.

< الحلقة السابقة         الحلقة التالية >

الرجوع للحلقة الاولى