كرونيك زوجتي لا تحبني - الحلقة 10

كرونيك زوجتي لا تحبني

_ عند زيد _

رحت للشومبرا تاع خالد لقيته يوجد في روحه قالي جاية خطيبتي تتعشى معانا، بقيت نخيرله في قش ونعاون فيه

زيد : خالد تعرفني نثق غير فيك، حاس بشي وخايف نحكيه

خالد : واش هو هادا الشي

زيد : حاس بجيهان تحبني منعرف تصرفاتها و يوم كل في شمبرتي لقديمة تصدق

سكت عليا ماقال والو، سكوته زاد شكوكي

زيد : خالد انت عارف شي اكيد

خالد : نتا شكون ضرك

زيد : وش قصدك انا شكون

خالد : انت زيد ولا زياد

زيد : بيني وبينك زيد و برا الغرفة هاذي زياد

خالد : اوكي بيني وبينك ... ايه تحبك مكانش لي مش عارف انها تحبك على فكرة حتى زياد كان عارف

زيد : زياد كان عارف وخبى عليا

خالد : ايه زياد كان عارف يسنى فيك انت تلاحظ بصحح انت محبيتش تلاحظها الا وقت اخترت تكون زياد ... اسمعني زيد برا غرفة هاذي جيهان متعنيلك والو راك زياد بالنسبة ليها مش زيد ... شهيناز هي لي تعنيلك اذا كنت تحب زياد صح ناوي تكون كيفه فإياك تلعب بمشاعر شهيناز

زيد : بصح حاس روحي نخون فيه

خالد : مزال عندك فرصة تعترف

زيد : لااااا رح نكمل، مشفتش يما كيفاه كل يوم ااه زيد بسبب طيش تاعه مات تخيل نقله زياد تنجلط

خالد : الله يهديك، مهم قلي هذا خير ولا هذا

كملت نخير معاه ... مباعد سمعت تليفوني يصوني ... هزيت

شهيناز : الو

زيد : اهلين

شهيناز : اني عند باب

هبطت نجري رحت فتحت باب

زيد : واش وين

شهيناز : ما جيتش ليك جيت ليماك

جات داخلة حكمتها

زيد : وش صاير شبيك

شهيناز : جايبة غداء و مروحة

دخلت شافت مع جيهان

جيهان : اهلا شهيناز وش حالك لباس

شهيناز : حمدلله ... جبت لغداء بعثاته ماما

جيهان : بعثاته لينا كل ولا لزياد برك ههههه

شهيناز : لا ليكم كل هههه

جات شهيناز مروحة قالتلها جيهان اقعدي وحلفتلها، قعدو مع بعضهم يقصرو ويضحكو بقيت نخزر فيهم لزوج نفكر في كلام خالد قاعد نقول شكون انا، لازمني نكون عبد واحد، نخزر في جيهان ونقول انا زيد ... نرجع نخزر في شهيناز نقول لااا انا زياد ... مباعد نضت قلت لشهيناز هيا نوصلك.

جيهان : هههه خليها تريح معانا

زيد : لالا

جيهان : كنت رح تاكلها بعينيك

شهيناز حشمت

شيهناز : انا نروح مال

حكمت يدها ومشيتها معايا، وصلتها لدارهم جات داخلة قلتلها شاهيناز خلينا نتسيبارو

_ عند جواد _

سمعت يما تعيط لجيهان، جيهان دات معاها هبة باه تشوفها يما، رحت انا غسلت يديا، قعدنا انا وجيهان و يما وجات خطيبة خالد ...

همست لجيهان قلتلها وينها هبة

جيهان : قالت متحبش تاكل في مجامع تعرف توحد حطيتلها في شمبرتكم

نضت ليها، دخلت شمبرا لقيتها قاعدة ماكان لا غداء لا والو

جواد : مش رح تتغداي

سكتت

جواد : نهدر معاك

هبة : هل يجوز لي كذب

جواد : نعرف متوحدين ميكذبوش قولي حقيقة

هبة : امك قالتلي جايين ضيوف، محبتش نقعد في طابلة قالتلي اسني هنا نجيبولك تاكلي

حكمتها من يدها مشيتها

جات تنحي يدها

خزرت في عينيها خلعتها بخزرتي

جواد : امشي لنكسرلك فكك

هبة : هبة متحبش عبد يمسها

نسيت روحي نحيت يدي قلتلها امشي قدامي مشات

جبتلها كرسي وقعدتها

خزرت لخطيبة خالد قلتلها هاذي مرتي

جيهان : والله كنت نحسبك تكذب بصح باين ضارب فيها عشقة

جواد : نتي حسابك معايااا مباعد

(خالد يحكي) قاعدين ناكلو قلتلها عجبك لغداء، قالتلي ايه شكرا ليكم، همستلها مش خسارة فيك بعدت عليا بطريقة محبيتهاش، سكتت عليها كملت ناكل شفت تليفونها جاه اشعار جات تشوف نحيتولها من يدها، قريت اسم لي بعثلها ميساج كان مراد ... جيت نثبت مع فوطو تاعو حتى خطفتلي التليفون من يدي، وتوترت بقيت على اعصابي زعما توصل بيها تخوني صح!

ناضت قالت ان امها مريضة لازم ترجع للدار نضت وصلتها طريق كل وانا ساكت خفت نضلمها، وصلتها ورجعت لدار قعدت نكسر في حوايج مقلق، جاني جواد كي سمع تكسير قالي شبيك

خالد : وش شعورك اذا تحس خطيبتك تخون فيك بصح انت مش قادر تكشف هذا شي

جواد : نفورسيها ونخليها تنطق

قعدت حطيت يدي على راسي

جواد : خالد كيفاه شاك فيها

خالد : تخون فيا تكلم فيه اصبر ضرك نعيطلها قدامك تخرج اوناطونت

عيطلتلها خرجت اوناطونت ...

خالد : على اساس تعاون في امها شدير بتليفون

جواد : مش سبب منطقي بلاك تليفونها يكلم بيه خوها او اي عبد ...

خالد : يكلم فيها فيسبوك فاتحة فيسبوك اخر باسم ثاني وتهدر معاه

جواد : تعرفه

خالد : شاك في واحد

جواد : شكون هو

جواد : واحد يبيع حذا حانوت تخدم فيه اسمه مراد

جواد ناض قالي خليها عليا

خالد : متتهورش

جواد : لا غير حنسقسي عليه ونجيب خبر

خالد : مذابيك حاب تريحني

راح وخلاني مع اني مرتحتش لواش راح يدير بصح خلاص كان عندي مهم نعرف واش يدور من ورايا باه منضلمهاش في تصرف

_ عند شهيناز _

صديتله وانا مصدومة ... قلت ممكن ماسمعتش مليح او اي شي، قلت وش؟ على اساس باه يصححلي الفهم ... جاوبني بنفس الكلمة ... خلينا نتسيبارو ... ديت نفس عميق حسيت بغصة جات فيا وبكية حصلتلي في رقبتي ماعرفت نطلقها ماعرفت نكتمها ...

شهيناز : وشيه لي راك تقول فيه مش فاهمة شبييك زياد شبيك وشيه لي تبدل

زيد : مش قادر نكمل في هاذي علاقة

قربتله تلمست خده

شهيناز : نعرف كل نمرو بظروف منقدروش نديرو اي شي نكرهو كل شي متفهمة

نحالي يدي بعد عليا

زيد : صدقينيي مارحش نقدر نكمل معاك، مش رح تفهمي لي راني نحس بيه، غير روحي كملي حياتك وسامحيني

جبد عليا بزربة وطلع في طاكسي وقلع، انا ثم طحت في لرض نبكي حتان فاقت بيا ماما جات دخلتني بسيف